චම්මිගේ හිතිවිල්ල
හීං හිමිදිරි ජාමයේ ශ්වේත මීදුම මැදින් මට පෙනේ දුර ඈත කඳු යාය මැකී නොමැකී වැසී නොවැසී පෙරදාක මගෙන් වෙන්ව ගිය ඔබ සේම පෑයිල්ල ගිනි කාස්ටක බව ඔබව පෙළමින් ඇති. මෙහේ සීතල මා වෙළා ගනිද්දී. අතමාරුවට යමක් හුවමාරු කරගන්නවා වගේ යමක් හැකිනම්...? මම බෙදමි මේ සීතල සිහිලසක් හදන්නට ඔබ ගතට. නැතත් මට ඔබේ උණුහුම රත්ව යයි මසිත සිහිපත්ව ඔබ විඳින අනේක විදි අතුරු අන්තරාවෝ ඔබට පාලනය කළ නොහැකි ස්වභාව දහමෙන් හා පාලනය කළ හැකි සගයින් නොකළ පාලනය නිසා ඇතිවෙන......... මගේ රට හැම විටම හැම දෙයින්ම පීඩා විඳින රටක් වෙමින් තිබියදී මිනිසුන්ගේ මිනිසත්කම් රකින්නට ඇවැසි සුව සරණක් දැන් ඕනෑ වෙමින් ඇතැයි මට සිතේ.
අපි කොතරම් අවස්ථාවාදී ද අන්තවාදී ද කියා දැක ගත හැක්කේ මෙවන් සමාජ ව්යසනවලදීම පමණකි. සුනාමිය , කෝවිඩ්, ගංවතුර, දිට්වා කුණාටුව මිනිසුන්ගේ සහකම්පනය රටට කියා පෑවේය. එසේම එදා ගෑස් හා ඉන්ධන පෝලිම්වලදී අපේ ඇතෑම් අයගේ හැසිරීම් අද එම අය වර්තමාන අසීරුතා සාධාරණීකරණය කරනාකාරය් දෙස බැලීමේදී පෙනී යන්නේ මිනිසුන්ගේ ගිලිහී යන ස්ථාවරයට වඩා ඔවුන් තමන්ගෙන් අවංක බව කොතරම් දුරට දුරස් කර ගන්නවාද යන්නයි. මේ මොහොතේ දී සිදුවෙන අසීරුතා අවම කර ගන්නට තිබුණා යැයි කියන්නා ද මේ පාලනය වෙනුවෙන් ඡන්දය පාවිච්චි කර තිබුනද එසේ හඬ නැඟීම නිසා ඔවුන්ට අනුව ඔහු ප්රතිගාමියකි. ඇත්ත ඇති සැටියෙන් නොදැන හෝ එය වසං කරමින් සිදුකරගන්නේ උඩ බලා කෙළ ගසා ගැනීමක් නොවේද? දිට්වා කුණාටුවද පාස්කු ප්රහාරය මෙන් කලින් දැනගෙන නිසි පිළියම් නොයෙදීම නිසා කරවටක් හිර කර ගත් පාපයකි. එසේමමැද පෙරදිග යුද්ධය ඇතිවෙමින් තිබියදී සුරංගනා වහසි බස් රටට පරකාශයක්ව ගෙදරට මරගාතයක් වූයේ කළයුතු දේ ඒ මොහොතේ නොකිරීමෙනි. මේ අඩුපාඩු සමාජීය වැරදි වෙන්නේ කෙසේද යන්න සොයා බැලිය යුතුය.
දෙමාපියන් දරුවන්ට දඬුවම් දෙන්නේ සැරවැර කරන්නේ තරහකට නොවේ. ආදරය නිසාය. ආදරය අනාගතයේ ඔවුන්ට නාඬා සිටින්නටය. එම නිවැරදි කිරීම් ගමේ මිනිසුන් හෙළා දකීනම් ඔවුන් ඌන කල්පනා ඇත්තෝය. එබැවින් මේ ආණ්ඩුවට වැරදි කියනා හැම එකාම විරුද්ධව ඡන්දය දුන්නෝම නොවෙති. බැංකුවේ දී මුදල් භාර ගන්නා අයකැමියෙකු තමන්ට ලැබෙන නෝට්ටුවල හොර නෝට්ටු තිබී අල්ලා ගතහොත් ඔහුට එයට ලකුණු නොලැබේ. එහෙත් ඔහු එය භාර ගැනීම වරදකි. ඒ හොර නෝට්ටු හඳුනා ගැනීම ඔහුගේ රාජකාරියේම කොටසක් බැවිනි. ඒ අනුව වසර තිහක් පමණ එතෙක් පැවති සියලු පාලනයන්ගේ වැරදි අඛණ්ඩව විවේචනය කළ, යහපත් යෝජනාවලට පවා එරෙහි වූ අය බලයට පැමිණිවිට ඔවුන්ද එම මගම යාම නව සමාජයක් වෙනුවෙන් ඔවුන් ගෙනා හදවත්වලට ලැබෙන දඬුවමකි. මේ නිසා මේ පාලකයන් දෙස බැලීමට ජනතාව පුරුදු වූයේ කරඬුවක් බෝ ගසක් දෙස බලන්නක් මෙන් වූ සිල් සිතකිනි. එවිට එම සිල් රෙද්දේ හිල් හෝ කළු ලප අතිවුවහොත් ඒවා එතෙක් දුටු කළු ලපවලට වඩා ඉතා පැහැදිලිව ප්රදර්ශනය වෙයි. මෙවැනි ඌනතා ආධුනිකත්වය උඩ වරක් දෙවරක් සිදුවිය හැකිය.
එහෙත් හෝද හෝදා මඩේ දැමීමත් මඩේ දමමින් සේදීමත් නිරන්තරයෙන් සිදුවීම ජන අපේක්ෂා බංග කිරීමකි. එසේ තිබියදිත් එම අඩුපාඩු නිවැරදි කරනොගෙන වසා ගැනීමට මඩ ගැසීම් හා හිස පිම්බුණු කතා කීම් වීදුරු ගෙවල්වල තිර රෙදි ගැළවීමකි.
එසේම මේ මොහොතේ ඉන්ධන ශාලාවල පෝලිම් ගැසෙන්නෝ සියල්ලෝම විරුද්ධවාදීන් හෝ කඩාකප්පල්කාරීහු විය හැකිද? කෝවිඩ් කාලේ ගත් තෙල් ඇතැයි තම මිත්රයෙක් තවම ඒ තෙල් ඇතැයි කීමෙන් ඒ ඇමතිවරයා නොකියා පිළිගන්නේ මේ දැනුත් පෝලිම් ඇතිකරන්නේ තමන්ගේ මිත්රයන් බවද?
ආණ්ඩුව තෙල් තිබෙනවා කීවා නම්, ගෑස් තිබේ කීවා නම් අර්බුදය හමුවේ සිදුවෙන දේවල් ඔවුන් නොදැන සිටියා කිව නොහැක. පාස්කුවේදි ආරක්ෂක ලේකම්ගේ ප්රකාශය ඔබට අමතක නැති බව මම දනිමි. එසේ නම් මොවුන් සිතුවේ යුද්ධය එච්චර දුර නොයයි අල්ලා නොසිටියි කියාද? මේ ආණ්ඩුව අපේ ය. එය ශ්රී ලාංකියාගේය. ඒ නිසා ඔවුන්ට ස්තාලය වසන්නට අශ්වයා යන තෙක් සිටීමට ඉඩ දී සිටිනු නොහැකිය. මේ අද සිදුවෙන්නේ කැරකෙන චක්රයේ එක් පැති කඩකි. මේ සියලු දේවල් ගැන විවිධ විවේචන හා අරගල කළ අපි ගෙනා මේ අයට ඇත්තේ ඒවා සිහිකරමින් තමන්ගේ පිළියම් යෙදීමයි. එහිදී එයට අඥාන ලෙස නිදහසට කරුණු කීමට ඉදිරිපත් වෙන්නෝ අපේ ආණ්ඩුව තවත් අමාරුවේ දමති. ඒ නිසා මේ සිදුවෙන්නේ චක්රය කැරකෙමින් පැවතීමයි. එහිදී කළ යුත්තේ මේක දිට්ඨ ධම්මවේදනීය කර්මය යැයි සිතා එය ජනතාව මතින් යැවීම් නොවේ. සියලු දෙනාට ගෞරවයෙන් ඇරියුම් කොට මේ අර්බුධයෙන් ගොඩ ඒමයි. එසේම සම්ප්රදායික දේශනා නොපවත්වා ජනතාවට දැනෙන්නට සත්ත්ය පැවසීමයි. මෙතෙක් කල් අනුන් රත්කරන හැළියේ කකුළුවන් තම්බනවා යැයි කීවද මෙතෙක් එහි සිටි එක කක්කුට්ටෙකුද නොවීය. එහෙත් දැන් ඒ හැළියේම ඔවුන් සියලුම ජනයා රත් කිරීම නවතාලිය යුතුව ඇත. එසේ නොවන්නට හැළිය උණු වී යා හැකිය.
නොඑසේ නම් රත්වෙන්නෝ හැළියෙන් පැන යා හැකිය. ඒ නිසා දැන් කළ යුත්තේ සුතනඹුවන් කුස ගින්නේ සිටියදී විකුණාගත් ඉඩම් ටිකේ මුදල් බැංකුවේ දමාගෙන පුරසාරම් දොඩන පියෙකු මෙන් නොවී දරුවන් නිසි ලෙස රැකීමයි. සගයිනි අප සියල්ලෝම පතන්නේ සසිරිබර මෙසිරිලක විනා අහවලාගේ එක කියන චේතනාවෙන් මිදෙමු.
වත්මන් පාලනය ගෙනාවේ ඒ නිසා මිස පෙරහුරු බලන්නට හෝ පවත්වන්නට නොවේ. අපි ශ්රී ලංකාවේය .
ශ්රි ලංකාව අපේ ය. බලයට පත්වෙන ඕනෑම ආණ්ඩුවක් ඒ ඇතුළේ ය. ඒ නි සා "සොබා දහමට නොවන අවනත ලොවේ කිසිවක් නෑ කියා" අටමස්ථානාධිපති පල්ලේගම හේමරතන නා හිමියන් ලියූ පද ගැන අපි යළි යළිත් විචාර බුද්ධියෙන් සිතමු. 
චම්මින්ද වෙලගෙදර .