මහින්ද තංගලු ගියා

මහින්ද රාජපක්ෂ මහතා අද පස්වරුවේ ඔහු හවුරුදු දහයක පමණ කාලයක් පදිංචිව හුන් ජනාධිපති නිල නිවසට සමු දී සිය ජයබිම වූ හම්බන්තොට දිස්ත්‍රික්කයේ තංගල්ල නගර මධ්‍යයේ ඇති 'කාල්ටන්' නිවසේ දිවි ගෙවන්නට නික්ම ගියේ ය

වත්මන් මාලිමා රාජ්‍ය පාලන තන්ත්‍රය විසින් ඊයේ (10) පාර්ලිමේන්තුවේ දී හිටපු ජනාධිපතිවරුන්ගේ වරප්‍රසාද ඉවත් කිරීමේ පනත් කෙටුම්පත පාර්ලිමේන්තුවේදී වැඩි ඡන්දයෙන් සම්මත කර ගැනීමෙන් අනතුරුව කතානායක ජගත් වික්‍රමරත්න මහතා විසින් සිය අත්සන තබා එය බලගැන්වීමෙන් අනතුරුව සිය වරප්‍රසාදය අහෝසිවීමේ හේතුවෙනි.

"ජනාධිපතිවරුන්ගේ හිමිකම් ඉවත් කිරීමේ" පනතේ විධිවිධානයන් අනුව හිටපු ජනාධිපතිවරුන් සඳහා ලබා දී ඇති නිල නිවාස ඔවුන්ට යළි රජයට භාරදීමට සිදුවීමත් සමඟ හේ එම නිවසින් සමුගත්තේ ය.

විජේරාම නිල නිවසින් ඔහු ඉවත්වීමට පෙර ශ්‍රී ලංකාවේ ශ්‍රී ලංකාවේ චීන තානාපති චී ෂෙන්හොන් ( Qi Zhenhong ) මහතා සමඟ කෙටි හමුවක් පවත්වන ලදි.

විජේරාම මාවතේ එම නිල නිවසේ දී ඔහු පැවැත්වූ අවසන් රාජ්‍ය තාන්ත්‍රික නිල හමුව චී ෂෙන්හොන් මහතා සමඟ වීම විශේෂයක් සේ සටහන් කිරීම වටී.

හිටපු ජනාධිපතිවරයා තංගල්ලට ළඟා වන විට සවස හතර පමණ විය. ඒ වන විටත් අති විශාල මහා ජනකායක් කාල්ටන් නිවෙසෙහි හා ඒ ඉදිරිපිට නගරසභා ගොඩනැගිල්ල ආසන්න ප්‍රදේශයේ රොක්වී ඔහු ගේ සම්ප්‍රාප්තිය අපේක්ෂාවෙන් හුන්හ. මේ පිරිස අතර හුන් මහා සංඝරත්නය ඔහුට ආශිර්වාද කරන්නට ඔහුගේ රිය ඉදිරියට වැඩම කළහ. සිය නිවහනට පිවිසි සැණින් ම මහ සඟරුවන ඔහුට සෙත් පිරිත් සජ්ඣායන කර ආසිරි පැතූහ.

පාර්ලිමේන්තුවේ හිටපු කතානායක මහින්ද යාපා අබේවර්ධන, මහතා ඇතුළු දේශපාලනඥයින් ද කාල්ටන් නිවහනේ  සිටිනු දක්නට ලැබිණි.