වතු ප්‍රජාවට සිදුවන බලපෑම කෙබඳුදැ යි කරන සමීක්ෂණය ගැන පුදුමයි
වත්මන් ජනාධිපතිවරයා ප්‍රමුඛ වත්මන් රජය වැට් බදු සියයට 18 දක්වා වැඩි කර ඇත්තේ එම වැඩි කිරීම තුළ සිදුවන මූල්‍ය බලපෑම ගැන ක්ෂේත්‍රය තුළ විධිමත්, විද්‍යාත්මක සමික්ෂණයකින් තොරව බව විපක්ෂ නායක සජිත් ප්‍රේමදාස මහතා අද (10) පාර්ලිමේන්තුවේදී පැවසීය.
වැට් බදු ඉහළ දැමීම නිසා ග්‍රාමීය, නාගරික සහ වතු ප්‍රජාවට සිදුවන බලපෑම ගැන රජය මේ අවස්ථාවේ සමික්ෂණයක් සිදු කිරීම ගැන තමා පුදුමයට පත්වන්නේ යැ යි ද, ප්‍රබුද්ධ ප්‍රශස්ත මූල්‍ය කළමනාකරණය තුළ බදු ගැසීමට පෙර හෝ බදු ඉවත් කිරීමට පෙර හෝ මූල්‍ය බලපෑම් ඇගයීමක් සිදු කළ යුතු වුව ද රජය එවැන්නක් මෙහි දී සිදු කර නොමැති යැ යි විපක්ෂ නායකවරයා පැවසී ය.
වැට් වැඩි කර එවැනි සමීක්ෂණයක් සිදු කිරීම බරපතල ගැටලුවක් බවත් පැවසු විපක්ෂ නායකවරයා, මේ නිසා සීනි, පරිප්පු, මිරිස්, කීරි සම්බා, සම්බා ආදී භාණ්ඩවල මිල ගණන් වැඩි වී ඇති ආකාරය වෙළෙඳපොළට ගොස් සොයා බලන ලෙස ද පාලකයන්ට පැවසී ය.