හෙළදිව සරසන ලේඛිකාවක්
ශ්‍යාමලි ගමගේ...
ඇය මේ දේශයේ වසන කතක් නොවේ.
දුරු රටක.... ඔව් දුරු රටක දිවි ගෙවන්නියකි.
මෙබිමෙන් බෝ දුර මහ සයුරෙන් එහා ඉමෙක දිවි ගෙවන්නට ශාමලී ගොසින් අදට හවුරුදු විසි හයකි.
ශ්‍යාමලී ජීවත්වෙන්නේ මෙසිරිලකින් නාවුක හැතපුම් හත්දාස් පන්සිය හැත්තැ හතරක් දුරින් පිහිටි රටක යි.
ආකාහෙන් පියඹා යන්නට නම් තවත් හැතැප්ම එකදාස් එකසිය හතළිස් දෙකක දුරකින් ලෝකයේ එක් අන්තයක දිවි ගෙවන ශාමලී කැනඩාවේ ටොරොන්ටෝ නුවර වසමින් ගුරු වෘත්තියේ යෙදෙන්නියකි
ඈ ගැන හෙළදිව මෙහෙම ලියන්නට හේතු කාරණා දෙකකි.
එකක් නම් ඈ සුද්දන්ට අයිති රට රාජ්‍යයක ජීවත් වුණත් කිසිදු විටෙක මව්බස, සිංහල භාෂාව හෑල්ලුවට ලක් නොකිරීමය. අප ඇය අගය කරන්නට මුල් ම හේතුව ඒ බව ඇයට ද ආඩම්බරයක් බව සඳහන් කරමින් මෙසේ සටහන් කරමි. ඉංගිරියෙන් ද ඈ කවි ලියන්නී ය. ඒකව් කීපයක් ඇගේ මුහුණු පොතේ පළ වී තිබී මනෙතට හසු විය.
ශ්‍යාමලී කිවිඳියකි. මුහුණු පොත ඇසුරේ සිය ගිණුමෙහි නිබඳව ම කවි සංකල්පනා සටහන් තබන ඈ පහුගිය දෙමසකට තරම් ඉහත දිනෙක මෙසිරිලකට ආවා ය. පැමිණියා ය.
ඒ ඇය විසින් රචිත කාව්‍ය සංග්‍රහ හෙවත් කවි පොත් තුනක් එළිදැක්වීම අරමුණු කර ගෙන යි.
ඉඩෝරය
ඉඩෝරය ළඟ
සුළඟත් වැටිලා
කර්කශ පොළොවේ - හුස්මත් සිඳිලා
වැව් ඉස්මත්තේ ඉරි තැලි අඬලා
වැස්ස වලාවන් නිහඬව මැකිලා
අඬන්න බැරි නෙතු කඳුළින් වැහිලා
උරේ බරට මල් සිහිනෙන් පිපිලා
කුසේ ගින්දරත් බඩටම ඇළිලා
වැස්ස වලාවන් ඇයිදෝ වැසිලා
වැවේ හඬට සුදු කොක්කුත් නටලා
පෙරුම් පුරාගෙන සමිඳුන් වැඳලා
නෙලන්නකෝ මා දෝතින් පුදලා
තවමත් අඩවා වැහිමල් පෙනිලා (මතක පද)
33 අබියස
හිතට වද දෙන මැදියමේ රෑ
වරක් හැඩ වුණු කැඩපතින් රුව
රවා බලමින් හිනැහුණා මට
මතකනේ කවදා ද අද දින
තට්ටු කරමින් දකින නිරුවත
නිවා රකුසන් කඳුළු ගිනි මැද
දවන අළු යට හිනැහුණේ ඇයි
මතක නෑනේ මුහුණු මට තව
අතින් අතට යන නෝට්ටුවේ හැඩ
බලා දෙවරක් මුහුණු හැඩතල
උකුසු දෙනුවන්යදින කෑදර
ඉකි ගසයි තිස්තුනේ අබියස (හුස්මට ළංවී)
ප්‍රේමය
සොයා අඩනා නිදන ප්‍රේමය
කෑ ගසා මැදිමේ කරුවල
දකින්නට බැරි කඳුළු සඟවන
නුඔම විය මගේ නපුරු සිහිනය
සොඳුරු වැස්සට අඬන ප්‍රේමය
නැවතී මඳකට කවිය හුරුකර
මතක පොදි බැඳ සෙමින් වද දෙන
නුඹම විය මගේ නපුරු හීනය
පෙරා සඳකැන් නිවා ගණඳුර
නිවා හදවත සිහිල් හඬකින්
සඳට පෙම් බඳි එකම තරුවයි
නුඹට අමතක මගේ ප්‍රේමය (සුදු හාමිනේ)
හුස්මට ළංවී, මතක පද, හා සුදු හාමිනේ ඈ විසින් ඉකුත් අගෝස්තු මහේ ජනගත කරන ලද්දේ කොළඹ 08 හෙවත් බොරැල්ලේ පිහිටි ගැහැනු පාසලක ශ්‍රවණාගාරයේ දී ය.
ඒ ඈ කෙලි පැටික්කියක සේ අයන්න, ආයන්න කියා විශ්වවිද්‍යාල ප්‍රවේශය සමත් කර ගැනීම දක්වා අධ්‍යාපනය ලද පාසලේ දී ස්වකීය නිර්මාණ ත්‍රිත්වය එළි දැක්වීම උදෙසා ම මව්බිමට සපැමිණියා ය.
ශ්‍යාමලී පාසල් ගමන ඇරඹුවේ ද අවසන් කළේ ද කොළඹ රත්නාවලි බාලිකා විද්‍යාලයෙනි.
ඈ විසින් එළි දක්වන ලද කාව්‍ය සංග්‍රහ ත්‍රිත්වයෙන් ලැබුණු මුදල් සිය පාසල් මෑණියන් වෙත ප්‍රදානය කිරීම කෙසේ නම් අගය නොකර සිටින්න ද?
'මතක පද' හොය හොයා 'හුස්මට ළං වී' , 'සුදු හාමිනේ' ජනගත කළ මහා මංගල්‍ය අවස්ථාවට එක්වන සේ ඈ දින ගණනාවක් ම තෙලබනුවෙන් අප අමතමින් ඇරයුම් කළා ය. බැලින්නම් හෙළදිව වෙබ් අඩවිය සංස්කාරක වරයා ඇගේ පොත් දොරට වැඩුමේ ප්‍රධාන ආරාධිතයා බව සටහන් කරන්නේ ඇය අප කෙරෙහි දක්වන ලද ගෞරවය කදිමට කියා පාන්නේ ද යන්න සිහිපත් කර කර ය.
ඒ පොත් මංගල්‍යයේ දී ශ්‍යාමලී ගමගේ රත්නාවලියේ වත්මන් සිසුවියන් පිරිසකට සපත්තු මිලදී ගන්නට මුදල් වවුචර පිරිනමද්දී ඈ සමඟ රත්නාවලියේ අකුරු කළ මිතුරියනට මෙන් ම විදුහල්පතිනියගේ ද ගුරුවරියන්ගේ ද දෙනෙත් තෙත්වන අයුරු මේ දැනුදු මැවී පෙනෙනා දසුනක් බව සටහන් නොකර බැරි ය.
මේ පද්‍ය සංග්‍රහ ත්‍රිත්වයට කලින් ශ්‍යාමලී තවත් කවි පොතක් පාඨකයින් වෙත තිළිණ කර ඇත. එය 'කවිය නුඹ' නම් කාව්‍ය සරණිය යි.
ශ්‍යාමලී සිව් දෙනකුගෙන් යුත් පවුලක බඩපිස්සී ය. ඇගේ පියා රජයේ රැකියාවක නිරත වූවත් මව කළේ දරුවන් ආදරෙන් සෙනෙහසින් රැකබලා ගනිමින් ඔවුන් උස්මහත් කිරීම යි.
කෙලි පැටික්කිය සංදියෙහි දී ම ඇගේ මව මේ කෙල්ල සෞන්දර්යාත්මක ක්‍රියාකාරකම්වල නිරත කිරීමට පෙළඹවූවා ය. ඒ මව සිය දියණිය ගුවන් විදුලියේ 'හඳමාමා' වැඩ සටහනෙක ළමා ගීයක් ගැයීමට යොමු කළා ය.
දොළොස් වියට ඈ පා තැබූ පසු බොරැල්ලේ තරුණ බෞද්ධ සංගමයේ පැවති නැටුම් පන්තියකින් ඕ නර්තනයට හුරු කළා ය.
සො‌ළොස් හැවිරිදි වයසට පිවිසි පසු නර්තන ශිල්පිනියක සේ සුපතල නමක් දරා හුන් පත්මිණී දහනායක ආචාර්යවරියගෙන් ඉන්දියානු නැටුම් ශිල්පය හැදෑරීමට දියණියන් යොමු කළ බව හෙළදිවට මේ කිවිඳිය සඳහන් කළේ අප හා දොඩමලු වෙද්දී ය. 'ටවර් හෝල්' හි ප්‍රසංග වලට සම්බන්ධ වීමට තරම් මේ කිවිඳිය වාසනාවන්ත වී ඇති බව කීවේ බොහොම උජාරුවෙනි.
ශ්‍යාමලි ගමගේ නම් යෞවනිය අදින් හවුරුදු 25 කට පෙර එනම් ක්‍රිස්තු වර්ෂ 2000 දී කරකාරේ ගිය පසු කැනඩාවේ පදිංචියට ගියා ය.
ඇගේ හැකියාවන් තව තවත් ඔප්නංවා ගැනීමේ නොතිත් ආසාවෙන් පෙළුණු ශ්‍යාමලී කැනඩාවේ පදිංචි සුනිල් ජයසිරි සංගීත වේදීයාණන් යටතේ සංගීතය හැදෑරීම් හි නිරතව ඇත.
ඈ විසින් ම ලියන ලද ගීත හතරක් ස්වතන්ත්‍ර නිර්මාණ සේ බිහිකරැති අතර ඒ ගීත සමුච්ඡයන් හි ගීතනු පෙළ ගස්වමින් සංගීතය සපයා ඇත්තේ සුනිල් ජයසිරි සංගීතඥ තෙමේ ය.
දුරු රටක හිඳිය ද ඈ අප හා කතා බහේ යෙදෙන විට එකදු ඉංග්‍රිසි වචනයක් හෝ ඇගේ වචනවලට ඈඳා නොගැනීම නිසා අප තුළ ඈ කෙරෙහි ඇති කරන්නේ අසීමිත ආදරයකි. සෙනෙහසකි.
මේ වන විට ශ්‍යාමලී ගමගේ නම් කිවිඳිය පද්‍ය රචනයේ යෙදෙමින් ම තවත් අලුත් වැඩකට අත ගසා ඇති බව කියයි. ප්‍රථම නවකතාව ඈ මේ දවස්වල ලියමින් සිටින්නී ය.
හෙළදිව ඊ පුවත් සංග්‍රහයේ 'කව් මිණි වැල්' වෙත නිබඳව ම ඇගේ නිර්මාණ යොමු කරනා මේ කවිකාරිය අපට එවන පදවැල් නම් බොහොම් රසය. අරුත් බර ය.
ශ්‍යාමලි ගමගේ නම් කිවිඳිය හෙළදිව් හි වසනා වත්මන් පරපුරට දුන් හා දෙන ආදර්ශය බෝ අගනේ ය. ඈ ලියමින් සිටින නවකතාව, නිර්මාණ කෘතිය ද නුදුරු දිනෙක පොත පතට පෙම්බැඳි ලාංකේය පාඨකයින් අතට පත් කරන්නට ඇයට සියලු ශක්තිය, දිරිය හා විවේක බුද්ධිය නොඅඩුව ලැබේවා!!
- සුගතපාල මැන්දිස් =