හරිනි, චමරිලා බෝ සේ අගැයැ යි
මේ දිනවල පැවැත්වෙන කාන්තා ලෝක කුසලාන ක්‍රිකට් තරඟාවලිය වෙනුවෙන් කණ්ඩායමේ සූදානම කෙබඳුදැ යි ඔවුන් සමඟ සුහද පිළිසඳරෙක නිරතවෙමින් අගමැතිනිය විමසා සිටියා ය.
ඒ ශ්‍රී ලංකා කාන්තා ජාතික ක්‍රිකට් කණ්ඩායමේ සාමාජිකයන්, අග්‍රාමාත්‍ය ආචාර්ය හරිනි අමරසූරිය අතර විශේෂ හමුවක් ඊයේ (23) අරලියගහ මන්දිරයේ දී පැවති අවස්ථාවේ දී ය.
කාන්තා ක්‍රිකට් කණ්ඩායම වෙනුවෙන් හා ක්‍රිකට් ක්‍රීඩාවේ ඉදිරි දියුණුව උදෙසා රජයෙන් ඉටුවිය යුතු කාර්‍යභාරය පිළිබඳව අග්‍රාමාත්‍යවරිය විසින් ක්‍රීඩිකාවන්ගේ අදහස් විමසුවා ය.
පාසල් සහ විශ්ව විද්‍යාල තුළ කාන්තා ක්‍රිකට් ක්‍රීඩාව සඳහා පවතින නැඹුරුව, පහසුකම් සහ එහි වත්මන් තත්ත්වයන් පිළිබඳව අග්‍රාමාත්‍යවරිය විසින් විමසා සිටි අතර ක්‍රීඩා ප්‍රවර්ධනය උදෙසා අධ්‍යාපන හා උසස් අධ්‍යාපන අමාත්‍යංශය හරහා උපරිම සහයෝගය ලබා දීමට ඇය පොරොන්දු විය.
ඉදිරි වසරේ සිට ක්‍රියාත්මක කිරීමට නියමිත නව අධ්‍යාපන ප්‍රතිසංස්කරණ හරහා ද ක්‍රීඩාවට වැඩි ඉඩක් වෙන්කොට ඇති බව අග්‍රාමාත්‍යවරිය විසින් මෙහි දී ප්‍රකාශ කළා ය.
පළාත් මට්ටමින් ක්‍රිකට් ක්‍රීඩාව ප්‍රවර්ධනය උදෙසා ගෙන ඇති ක්‍රියාමාර්ග සම්බන්ධව ද අගමැතිනියගේ විශේෂ අවධානය යොමු වූ අතර, ක්‍රීඩාවට මුළු රටම එක් කිරීමේ හැකියාව ඇති බව පවසමින් සෑම පළාතකම එක හා සමාන පහසුකම් සහිතව සෑම ක්‍රීඩාවක්ම දියුණු කිරිමේ වැදගත්කම අවධාරණය කළා ය.
තවද මෙහි දී ක්‍රීඩිකාවන්ගේ ආරක්ෂාව හා ඔවුනට අවශ්‍ය පහසුකම් ලබාදීමේ කටයුතු සම්බන්ධව ද අගමැතිනියගේ අවධානය යොමු වූ අතර කාන්තා ක්‍රිකට් ක්‍රීඩාව මෙරටේ ජනප්‍රිය ක්‍රීඩාවක් ලෙස ඔසවා තැබීමට කාන්තා ජාතික ක්‍රිකට් කණ්ඩායම දැක් වන දායකත්වය සහ කැපවීම වෙනුවෙන් ස්තූතිය පුද කර සිටියා ය.
ඔක්තෝබර් 24 දින පැවැත්වෙන ශ්‍රී ලංකාව සහ පාකිස්තානය අතර පැවැත්වෙන තරගයට සුබ පැතුම් එක් කළ අග්‍රාමාත්‍යවරිය, 2025 කාන්තා ක්‍රිකට් ලෝක කුසලාන තරඟාවලිය සඳහා හොඳින් මුහුණදීමට ජාතික ක්‍රිකට් කණ්ඩායම වෙත සිය ශුභාශිංසන පුද කරන ලදී.
මෙම අවස්ථාව සඳහා ක්‍රීඩා නියෝජ්‍ය අමාත්‍ය සුගත් තිලකරත්න , කාන්තා ජාතික ක්‍රිකට් කණ්ඩායමේ නායිකා චමරි අතපත්තු, උප නායිකා අනුෂ්කා සංජීවනී සහ ක්‍රිකට් කණ්ඩායමේ සාමාජිකාවන්, ශ්‍රී ලංකා ක්‍රිකට් ආයතනයේ සභාපති ශම්මි සිල්වා, ලේකම් බන්දුල දිසානායක, භාණ්ඩාගාරික සුජීව ගොඩලියද්ද සහ කාන්තා ජාතික ක්‍රිකට් කණ්ඩායමේ පුහුණුකරු රුමේෂ් රත්නායක යන මහත්වරුන් ඇතුළු පිරිසක් සම්බන්ධ විය.