ජගත් ගේ සතියේ සටහන - 132
අනුර ගේ ජනාධිපති දෙවර්ෂ පූර්ණය 21 දා
ජාතික ජන බලවේගයේ නායක අනුර කුමාර දිසානායක මහතා 2024 සැප්තැම්බර් 21 වැනිදා පැවති ජනාධිපතිවරණයෙන් ජයගෙන ජනාධිපති පදවියට පත්වී සැප්තැම්බර් 21 වැනිදාට වසර දෙකක් සම්පූර්ණ වෙනවා.
ආණ්ඩුවට වසර දෙකක් සම්පූර්ණ වීමත් සමඟ අමාත්ය මණ්ඩලයේ සංශෝධනයක් සිදු කිරීමට ජනාධිපතිවරයා ඇතුළ ජාතික ජන බලවේගය තීරණය කොට ඇතැ යි ආණ්ඩුවේ අභ්යන්තර ආරංචි මාර්ග පවසනවා.
පැලවත්තේ දී ඉහළ පෙළේ සාකච්ඡාවක දී යෝජනා වෙලා?
ලබන නොවැම්බරයේ ඉදිරිපත් කෙරෙන රජයේ අයවැය සකස් කිරීම සඳහා පසුගිය දිනවල ජනාධිපතිවරයා එක් එක් අමාත්යාංශවල ඇමතිවරුන් ඇතුළු නිලධාරීන් ගෙන්වා සාකච්ඡා පැවැත්වුවා.
එක් එක් අමාත්යාංශ පසුගිය දෙවසර තුළ කටයුතු කොට ඇති ආකාරය හා ලබා තිබෙන ප්රගතිය පිළිබඳව මෙහිදී ජනාධිපතිවරයා නිරීක්ෂණ කොට තිබෙනවා. ඒ අනුව අඩු ප්රගතියක් දක්වා ඇති අමාත්යාංශ කෙරෙහි අවධානය යොමු කරමින් කැබිනට් මණ්ඩල සංශෝධනයක් සිදු කිරීමට පසුගිය දා පැලවත්ත පක්ෂ මූලස්ථානයේ පැවති ඉහළ පෙළේ සාකච්ඡාවක දී තීරණය වූ බව ද එම ආරංචි මාර්ග තව දුරටත් පැවසුවා.
එසේම විෂයයන් කිහිපයක් පැවරී තිබීම නිසා ඇතැම් ඇමතිවරුන්ට එක් විෂයක් ගැන වැඩි අවධානයක් යොමු කිරීමට නොහැකිවීම හේතුවෙන් සමහර අමාත්යාංශවල කටයුතු දුර්වල තත්වයක පවතින බවත් එම ඉහළ පෙළේ හමුවේ දී සාකච්ඡා වී ඇති බව ද වාර්තා වෙනවා.
නලින්දට විදෙස් ඇමතිකම!
සෞඛ්ය ජාජබ ලේකම් වෛද්ය නිහාල්ට?
ජනමාද්ය හා සෞඛ්ය ඇමති වෛද්ය නලින්ද ජයතිස්ස මහතා විදේශ කටයුතු ඇමති ලෙසත්, විදේශ කටයුතු ඇමති විජිත හේරත් මහතා ජනමාධ්ය ඇමති ලෙසත් සෞඛ්ය ඇමති වශයෙන් ජාතික ජන බලවේගයේ ලේකම්, පාර්ලිමේන්තු මන්ත්රී වෛද්ය නිහාල් අබේසිංහ මහතා පත් කිරීම ගැනත් මෙහිදී යෝජනා වී තිබෙනවා.
කෘෂිකර්මෙ ලාල්ගෙන් හැළේ?
එසේම කෘෂිකර්ම, පශු සම්පත්, ඉඩම් හා වාරිමාර්ග අමාත්යාංශයෙන් ඉඩම් හා වාරිමාර්ග වෙන්කොට ඉඩම් සහ වාරිමාර්ග ඇමති ධූරය ලාල් කාන්ත මහතාට ලබා දීමටත්, කෘෂිකර්ම හා පශු සම්පත් ඇමති ධූරයට වෙනත් ඇමතිවරයකු පත් කිරීමටත්, මෙහිදී සාකච්ඡා වූ බව ද පැලවත්තෙන් වාර්තා වෙනවා.
එහෙත් මෙම ඉහළ පෙළේ සාකච්ඡාවේ දී ඉදිරිපත් වූ යෝජනා පිළිබඳව මෙතෙක් අවසන් තීරණයකට එළඹ නැති බවත් එම ආරංචි මාර්ග තව දුරටත් ප්රකාශ කළා.
එසේම පාර්ලිමේන්තුවේ දීත්, පිටතදීත් ආණ්ඩුව වෙනුවෙන් කැපී පෙනෙන කාර්යභාරයක් සිදු කරන මන්ත්රීවරුන් කිහිප දෙනකු නියෝජ්ය ඇමතිවරුන් ලෙස පත් කිරීමට ජනාධිපතිවරයා ගේ අවධානය යොමු වී ඇති බවත්, දැනගන්නට තිබෙනවා.
•••• ••••• •••••
ආණ්ඩුවේ දෙවසරක ප්රගතිය ගැන කියන්න රැලි මාලාවක් - ඇරඹුව සැප් 6 වනදා
මේ අතර ආණ්ඩුවේ දෙවසරක ප්රගතිය පිළිබඳව ජනතාව දැනුවත් කිරීම සඳහා ලබන සතියේ සිට ජන රැලි මාලාවක් පැවැත්වීමට ජාතික ජන බලවේගය තීරණය කොට ඇති අතර එහි පළමුවැන්න සැප්තැම්බර් 6 වැනිදා කළුතර දිස්ත්රික්කයේ බේරුවල දී හා බුලත්සිංහල දී පැවැත්වෙන බව ජාතික ජන බලවේගයේ ප්රකාශකයෙක් කියා සිටියා.
ජනාධිපති අනුර කුමාර දිසානායක මහතා ගේ ප්රධානත්වයෙන් මෙම ජන රැලි මාලාවේ දෙවැන්න සැප්තැම්බර් 12 වැනිදා පොළොන්නරුවේ දී හා 13 වැනිදා අනුරාධපුරයේ දී පැවැත්වෙනවා.
ඉන්පසු අනෙකුත් රැලි සැප්තැම්බර් 20 වැනිදා මාතර දී හා 27 වැනිදා ගම්පහ දී පැවැත්වීමට කටයුතු යොදා තිබෙනවා.
මෙයට අමතරව පසුගිය සති කිහිපය තුළ ජනාධිපති අනුර කුමාර දිසානායක මහතා මාලිමාවේ සාමාජිකයින් හමුවී පක්ෂයේ හා ආණ්ඩුවේ කටයුතු ගැන ඔවුන් දැනුවත් කිරීම සඳහා මැතිවරණ කොට්ඨාස මට්ටමින් නිල නොවන රැස්වීම් ගණනාවකට සහභාගි වී තිබුණා.
සෑම මැතිවරණ කොට්ඨාසයක ම මාලිමාවේ ප්රාදේශීය ප්රධානියකුගේ නිවසේ පැවති රැස්වීම්වලට පිටස්තර අය සහභාගි කරවා ගෙන නැහැ. ආණ්ඩුවෙන් ඈත්වී සිටි හා කලකිරී සිටි පාක්ෂිකයින් හා ආධාරකරුවන්ට ආණ්ඩුවේ කටයුතු ගැන මෙහිදී කරුණු පැහැදිලි කර දී ඇති අතර ඔවුන් දිගට ම පක්ෂය තුළ රඳවා ගැනීම මෙම රැස්වීම් මාලාවේ අරමුණ වී තිබුණා.
මේ අතර ආණ්ඩුව විසින් පාර්ලිමේන්තුවේ දී සම්මත කර ගැනීමට යන 22 ආණ්ඩුක්රම ව්යවස්ථා සංශෝධන පනත් කෙටුම්පතට එරෙහිව පසුගිය සිකුරාදා (28 ) වන විට ශ්රේෂ්ඨාධිකරණයට මූලික අයිතිවාසිකම් පෙත්සම් 27 ක් ඉදිරිපත් වී තිබුණා.
මෙයින් පෙත්සම් 24 කින් ඉල්ලා තිබුණේ යෝජිත පනත් කෙටුම්පත ආණ්ඩුක්රම ව්යවස්ථාවට පටහැනි බව ප්රකාශ කරන ලෙසයි. අනික් පෙත්සම් තුනක් මගින් යේජිත පනත් කෙටුම්පත ආණ්ඩුක්රම ව්යවස්ථාවට එකඟ බවට ප්රකාශ කරන ලෙස ඉල්ලා තිබුණා.
යෝජිත 22 වැනි ආණ්ඩුක්රම ව්යවස්ථා සංශෝධන පනත් කෙටුම්පතට විරුද්ධව පෙත්සම් ඉදිරිපත් කොට ඇති පිරිස පසුපස සිටින්නේ හිටපු ජනාධිපති හා එක්සත් ජාතික පක්ෂ නායක රනිල් වික්රමසිංහ මහතා බවයි පැවසෙන්නේ. 
22 වැනි ආණ්ඩුක්රම ව්යවස්ථා සංශෝධනය සම්බන්ධයෙන් ශ්රේෂ්ඨාධිකරණයට පෙත්සම් ඉදිරිපත් කිරීම සඳුදා (31) අවසන් වන අතර ඒ පිළිබඳ ශ්රේෂ්ඨාධිකරණ විභාගය සැප්තැම්බර් 2 වැනිදා ආරම්භ වීමට නියමිත යි.