පාර්ලිමේන්තු මහ ලේකම්වරියටත් කතානායක පුප්පලා – ජනපතිට පැමිණිලි

සඟ විරෝධය ආණ්ඩුවට සෑහෙන්න දැනිලා

බන්ධනාගාර ගතව සිර දඬුවම් විඳිමින් සිටින ගලගොඩඅත්තේ ඥාණසාර හිමියන් වැලිකඩ බන්ධනාගාරයේ සිට තවත් නඩුවක් සඳහා පසුගිය සතියේ අලුත්කඩේ අධිකරණය වෙත ගිහි ඇඳුමකින් රැගෙන ඒමට එරෙහිවභික්ෂූන් වහන්සේලා සහ බෞද්ධ සංවිධාන මූලික වී විරෝධතා රැල්ලක් ඇති කිරීමටප්‍රබල හේතුවක් වී තිබුණා.

ඥාණසාර හිමියන් අයත් කෝට්ටේ සාමග්‍රී සංඝ සභාවේ අනු නායක කොටපිටියේ රාහුල හිමියන් මේ ගැන විරෝධය පළ කරමින් බන්ධනාගාර කොමසාරිස් ජෙනරාල් වෙත ලිපියක් යවා තිබු අතර සෙසු නිකායන් හි මහා නායක හිමිවරුන් ද ඥාණසාර හිමියන් ගේ සිවුර ගලවා වෙනත් ඇඳුමක්ඇන්දවීම ගැන ආණ්ඩුවේඉහළ තැන්වලට විරෝධය පළ කළා.

ආණ්ඩුවට ද මෙම විරෝධය දැනී තිබු බැවින් ජනාධිපති අනුර කුමාර දිසානායක මහතා හා ප්‍රධාන පෙළේ භික්ෂූන් වහන්සේලා පිරිසක් ජනාධිපති කාර්යාලයට වැඩම කරවා උන්වහන්සේලා සමඟ මේ ගැන සාකච්ඡා කළා.

වසර තුනකට වැඩි කාලයක් සිර දඬුවම් නියම වී සිටින ඥාණසාර හිමියන්ට බන්ධනාගාර නීති අනුව සෙසු සිරකරුවන්ට ලබා දෙන 'ජම්පරය'උන්වහන්සේට ද ලබා දුන්නා.

ඊට පසු දින එනම් ඔක්තෝම්ර් 6 වැනිදා ඥාණසාර හිමියන්ට විරුද්ධව කොළඹ මහාධිකරණයේ විභාග වන තවත් නඩුවක් සඳහා උන්වහන්සේ සුදු පැහැති ජාතික ඇඳුමින් සැරසී අධිකරණය හමුවේ පෙනී සිටියා.

කොළඹ මහාධිකරණ විනිසුරු බුද්ධික ශ්‍රී රාගල මහතා හමුවේ විභාග වෙන මෙම නඩුවෙන් 2014 අප්‍රේල් 12 වැනිදා කොළඹ දී ඉස්ලාම් ආගමට එරෙහිව සිදු කළ ප්‍රකාශයකින් එම ආගමට අපහාසයක් කර ආගමික සංහිඳියාවට බාධා කල බවට ඥාණසාර හිමියන්ට එරෙහිව චෝදනා ඉදිරිපත් කොට තිබුණා.

ඥාණසාර හිමියන් ගේ සිවුර ඉවත් කිරීම සම්බන්ධයෙන් භික්ෂූන් වහන්සේලාගෙන් එල්ල වූ විරෝධය හේතුකොට ගෙන ජනාධිපතිවරයා ජනාධිපති කාර්යාලයේ දී ඉකුත් 8 වනදා නායක හාමිවරුන් පිරිසක් සමඟ පැවැත්වූ සාකච්ඡාවෙන් පසු බන්ධනාගාර නීති සංශෝධනය කිරීම සඳහා නිර්දේශ ඉදිරිපත් කිරීමට බුද්ධ ශාසනඅමාත්‍යාංශයේ ලේකම්, බන්ධනාගාර කොමසාරිස්වරයා ඇතුළු 10 දෙනකුගෙන් සමන්විත කමිටුවක් පත් කළා.

මේ අතර වෛද්‍ය ප්‍රතිකාර ලබා ගැනීම සඳහා සිංගප්පූරුවට ගොස් සිටි රනිල් වික්‍රමසිංහ මහතා පසුගිය 9 වනදා දිවයිනට පැමිණියා.

එදින (9) සවස වික්‍රමසිංහ මහතා මල්පාරේ සිය කාර්යාලයේ දී ඒකාබද්ධ විපක්ෂයේ නායකයින් හමුවී ඥාණසාර හිමියන්ට ගිහි ඇඳුම් අන්දවා අධිකරණයට ගෙන ඒම ගැන දීර්ඝ ලෙස සාකච්ඡා කොට තිබුණා. එදිනම හිටපු ජනාධිපති වරයා උලපනේ සුමංගල හිමියන් හා බලංගොඩ කස්සප හිමියන් ද කොළඹ ස්ථාන දෙකක දී හමුවී සාකච්ඡා කොට තිබෙනවා.

ඥාණසාර හිමියන්ගේ සිද්ධියට විරෝධය පා මහා සංඝරත්නය විසින් මහනුවර දළඳා මාළිගාව අසල දී ප්‍රතිඥාවක් දී පාගමනක් ආරම්භ කිරීම ගැන එහිදී උන්වහන්සේලා සමඟ සාකච්ඡා කළ බව වාර්තා වෙනවා.

මෙය භික්ෂූන් වහන්සේලා විසින් ආගමික කටයුත්තක් වශයෙන් කළ යුතු අතර එයට දේශපාලනඥයින් සම්බන්ධ කර නොගන්නා ලෙස ද රනිල් වික්‍රමසිංහ මහතා සුමංගල හිමියන්ට හා කස්සප හිමියන්ට උපදෙස් දී තිබෙනවා.

ඔක්තෝම්බර් 10 වැනිදා මහනුවරින් ඇරඹි පාගමනින් ප්‍රධාන ඉල්ලීඹ වී තිබුණේ ඥාණසාර හිමියන් අධිකරණයට රැගෙන ඒමේ දී උන්වහන්සේට ගිහි ඇඳුම ඇන්දවීමට විරෝධය පෑමයි. එහෙත් පාගමන කෑගල්ලට ළඟා වන විට එම ඉල්ලීම 'ඥාණසාර හිමියන්ට ජනාධිපති සමාව දී වහාම නිදහස් කරනු'යනුවෙන් වෙනස් වී තිබුණා.

පාගමන කඩවතට ළඟා වූ විට විමල් වීරවංශ, උදය ගම්මන්පිල, සරත් වීරසේකර, ප්‍රසන්න රණවීර, චන්න ජයසුමන ඇතුළු දේශපාලන පක්ෂ නායකයින් රැසක් එක්වූ අතර පාගමනේ වඩින භික්ෂූන් වහන්සේලාට දානමය ඇතුළු පහසුකම් සැලසීමට සමගි ජන බලවේගය, පොදුජන එක්සත් පෙරමුණ, එක්සත් ජාතික පක්ෂයේ සමාජිකයින් හා ආධාරකරුවන් ඉදිරිපත් වී සිටියා.

මෙම පාගමනට එක්ව සිටි බොහෝ භික්ෂූන් වහන්සේලා 'සිවුරට අත නොතබනු'යන සටන් පාඨය පෙරදැරි කොට ගෙන සහභාගි වුව ද, එය මෙහෙය වූ  හිමිවරුන් ගේ ප්‍රධාන අරමුණ වී තිබුණේ මේ මඟින් විශාල ආණ්ඩු විරෝධයක් රට පුරා ඇති කිරීමයි.

පාගමනේ පැමිණි භික්ෂූන් වහන්සේලා එක් රැයක් ජනාධිපති කාර්යාලය ඉදිරිපිට ගත කොට පසුදා බුද්ධ ශාසන අමාත්‍යාංශය වෙත ගමන් ගත්තා. එහිදී එම අමාත්‍යාංශයේ ලේකම් හමුවී සාකච්ඡා කළත්, උන්වහන්සේලා අපේක්ෂා කළ පිළිතුර ලැබී තිබුණේ නැහැ.

මේ වන විට ජනාධිපතිවරයා භික්ෂූන් වහන්සේලා බන්ධනාගාර ගත වූ විට ලබා දියයුතු ඇඳුම පිළිබඳවත්, ඒ හා සම්බන්ධ බන්ධනාගාර නීති සංශෝධනය කිරීම සඳහා නිර්දේශ ඉදිරිපත් කිරීඹටත්, කමිටුවක් පත්කොට තිබුණා.

එම කමිටුව විසින් අතුරු වාර්තාවක් පසුගිය සතියේ ජනාධිපති ලේකම්වරයාට භාර දෙනු ලැබුවා.

එම කමිටුවේ අතුරු වාර්තාවේ නිර්දේශයන් හෙළි කළ අධිකරණ හා ජාතික ඒකාබද්ධතා ඇමති හර්ෂණ නානායක්කාර මහතා මින් ඉදිරියට භික්ෂූන් වහන්සේලා බන්ධනාගාරයේ සිට අධිකරණයට ඉදිරිපත් කරන අවස්ථාවේ සිවුරු දැරීමට අවස්ථාව ලබා දෙන බව ප්‍රකාශ කළා.

මේ අතර බුද්ධ ශාසන අමාත්‍යාංශයේ සාකච්ඡාව අසාර්ථක වූ බැවින් පාගමනේ පැමිණි භික්ෂූන් වහන්සේලා පිරිසක් විහාර මහා දේවී උද්‍යානයේ බූද්ධ ප්‍රතාමාව අබියසට ගොස් සත්‍යග්‍රහයක් ආරම්භ කොට තිබෙනවා.

මේ වන විට එම සත්‍යග්‍රහ භූමියේ භික්සූන් වහන්සේලා කිහිප නමක් හා ගිහියන් සුළු පිරිසක්රැඳී සිටින අතර උලපනේ සුමංගල හා බලන්ගො කස්සප යන හිමිවරුන් ඔවුන්ට නායකත්වය දෙනවා.

සෙනසුරාදා රාත්‍රියේ සත්‍යග්‍රහ භූමියේ කූඩාරමක් ඉදිකිරීමට යාමේ දී පොලිසිය පැමිණ එය වැළැක්වීමට කටයුතු කිරීම නිසා උණුසුම් තත්වයක් ඇති වී තිබුණා. එහිදී ඇති වූ තෙරපීමකින් ඇද වැටුණු බලන්ගොඩ කස්සප හිමියන් 1990 ගිලන්රියකින් ජාතික රෝහල වෙත ගෙන ගියා.

රෝහලේ දී කරන ලද වෛද්‍ය පරීක්ෂණවලින් හෙළිවී තිබුණේ කස්සප හිමියන්ට රෝගී තත්වයක්නොමැති බවය. පැයක පමණ කාලයක් රෝහලේ ගත කළ උන්වහන්සේ සිය කැමැත්තෙන් ම රෝහලෙන් පිටවී ගිය බව ජාතික රෝහලේ අධ්‍යක්ෂවරයා පැවසුවා.

එහෙත් උලපනේ සුමංගල හිමි ප්‍රකාශ කළේ කස්සප හිමියන්ට පොලිසිය පහර දුන් බවයි. එම අවස්ථාවේ මාද්‍යවේදීන් රැසක් කැමරා මානාගෙන සිටි නමුත් කස්සප හිමියන්ට පහර දෙන බවක් ඔවුන්ගේ කැමරාවල සටහන් වී තිබුණේ නැහැ.

සමගි ජන බලවේගයේ නායක සජිත් ප්‍රේමදාස මහතා එම රාත්‍රියේ ම නිවේදනයක් නිකුත් කරමින් කස්සප හිමියන්ට පොලිසිය පහරදීම තරයේ හෙළා දකින බව පවසා තිබුණා. එක්සත් ජාතික පක්ෂය ද කස්සප හිමියන්ට පොලිසිය පහර දුන් බව පවසා එය හෙළා දකිමින් ප්‍රකාශයක් නිකුත් කොට තිබෙනවා.

මේ අතර ඉරිදා (18) බදුල්ලේ පැවති ජාතික ජන බලවේගයේ කාන්තා රැළියක් ඇමතූ ජනාධිපති අනුර කුමාර දිසානායක මහතා පැවසුවේ නීතිමය ක්‍රියාවලියේ අවසන් වග විභාගය සිදු කරන්නේ ශ්‍රේෂ්ඨාධිකරණය බැවින් අධිකරණය දෙන තින්දු වෙනස් කරන ලෙස බලපෑම් කිරීමෙන් නීතියේ ආධිපත්‍යයපැවතිය නොහැකි බව යි.

අධිතරඛ පද්ධතිය දෙන තීන්දු නීතිය නිවැරදි ම නිගමනය ලෙස රජය පිළිගන්නා බවත්, ස්වාධීනව නීති ක්‍රියාත්මක කිරීමට අදාළ ආයතනවලට පූර්ණ බලය ලබා දී ඇති බවත්, ජනාධිපතිවරයා එහිදී තව දුරටත් ප්‍රකාශ කළා.

ජනාධිපතිවරයාගේ මෙම ප්‍රකාශයෙන් ලැබෙන ඉඟිය නම් ඥාණසාර හිමියන්ට අධිකරණය මගින් ලබා දී තිබෙන තීන්දුව වෙනස් කිරීමට රජය සූදානම් නැති බවයි.එසේම ඥාණසාර හිමියන්ට විරුද්ධව තවත් නඩු දෙකක් විභාග වෙමින් පවතින අතර ඒ පිළිබඳව අධිකරණ තීන්දුව ලැබීමට තිබිය දී උන්වහන්සේට සමාව දී නිදහස් කරන ලෙස ඉල්ලා සිටීම නීතියට පටහැනි බවයි නීතිවේදීන් පවසන්නේ.

මේ අතර පාර්ලිමේන්තුවේ කතානායක වෛද්‍ය ජගත් වික්‍රමරත්න මහතාට විරුද්ධව විපක්ෂය විසින් ඉදිරිපත් කොට ඇති විශ්වාස භංග යෝජනාව පිළිබඳ විවාදය දින නියමයක් නැතිව කල්දමා තිබෙනවා.

 චෝදනා 50 කින් යුත් එම විශ්වාසභංග යෝජනාව මේ වන විට පාර්ලිමේන්තුවේ න්‍යාය පුස්තකයට ද ඇතුළත් කොට තිබෙන නමුත් පසුගිය සතියේ පැවති පාර්ලිමේන්තුවේ කටයුතු පිළිබඳ කාරක සභාවේ දී ආණ්ඩුවපෙන්වා දී ඇත්තේ එහි සඳහන් සමහර චෝදනා පිළිබඳ නීතිපතිවරයාගේ උපදෙස් ලබා ගැනීමට තිබෙන බවයි. විපක්ෂය ද එය පිළිගෙන තිබෙන බැවින් විශ්වාසභංගය පිළිබඳ විවාදය දින නියමයක් නොමැතිව කල් දැමීමට සිදුවුණා.

එහෙත් මෙම විශ්වාස භංග යෝජනාව ඉදිරිපත් කරන බව විපක්ෂය පාර්ලිමේන්තුවේ දී ප්‍රකාශ කළ අවස්ථාවේ සභානායක බිමල් රත්නායක මහතා කියා සිටියේ වශ්වාසභංග යෝජනාව ඉදිරිපත් වූ පසු ඊළඟ සතියේ ම ඒ සඳහා විවාදයට දින ලබාදෙන බවයි.

එහෙත් ආණ්ඩුව මෙම විශ්වාස භංග යෝජනාව කල් දැමීමට කටයුතු කළේ එය විවාදයට ගැනීමට පෙර කතානායක වරයාට තනතුරින් ඉල්ලා අස්වීමට අවස්ථාව ලබා දීම සඳහා බව දේශපාලන විචාරකයින් පවසනවා.

දැනගන්නට තිබෙන අන්දමට කතානායකවරයාගේ ක්‍රියාකලාපය ගැනත් ඔහුගේ යම් යම් අනීතික කටයුතුවලට සහාය නොදීම හේතුවෙන් තමාට අපහාසාත්මක ලෙස දොස් පැවරූ බවත්, සදහන් කරමින් පාර්ලිමේන්තුවේ මහ ලේකම් කුෂාණි රෝහණධීර මහත්මිය ජනාධිපතිවරයා වෙතපිටු 12 කින් යුත් විස්තරාත්මක ලිපියක් යවා තිබෙනවා. එය කියවූ ජනාධිපතිවරයා වහාම කතානායක තනතුරෙන් ඉල්ලා අස්වන ලෙස වෛද්‍ය ජගත් වික්‍රමරත්න මහතාට නියෝග කොට ඇති බවත් වාර්තා වෙනවා.

ඒ අනුව ඔහු ඉදිරිදින කිහිපය තුළ ඉල්ලා අස්වීමට යන බව ද දැනගන්නට තිබෙනවා.

 - ජගත් -