කතානායක ජගත්ට බොහොමත් අපල කාලයක්?

දයාසිරි ගේ වරප්‍රසාද ප්‍රශ්නය!!!?

ජාතික ජන බලවේගයේ ආණ්ඩුවට වසර දෙකක් සම්පූර්ණ වීම නිමිත්තෙන් ජනාධිපති අනුර කුමාර දිසානායක මහතා ගේ ප්‍රධානත්වයෙන් දිස්ත්‍රික් මට්ටමින් පවත්වා ගෙන යන රැළි මාලාවේ පොළොන්නරු රැළියත්, ශ්‍රී ලංකා පොදුජන පෙරමුණ විසින් අනුරාධපුරයේ දී පවත්වන ලද ජන සටන රැළියත් නිසා මේ සති අන්තයේ රටේ දේශපාලනය උණුසුම් වී තිබුණා.

ආණ්ඩුවත්, විපක්ෂයත් තමන්ගේ ශක්තිය ප්‍රදර්ශනය කිරීම සඳහ ගෙන තිබු උත්සාහයන් හේතුවෙන් මෙම රැළි දෙකට ම අති විශාල ජනතාවක් සහභාගි වී සිටියා.

වී මිළ, පොහොර ප්‍රශ්නය හා නියඟය නිසා බැට කන ගොවි ජනතාව බහුලව සිටින ‌පොළොන්නරුවේ පැවති ආණ්ඩුවේ රැළියට ද අති විශාල ජනතා සහභාගිත්වයක් දක්නට ලැබුණා.

ලාල්කාන්තත් නාමල් කරුණාරත්නත් නැතී ගොවි රැළිය 

ටී. බී, සරත්, වසන්ත සමරසිංහ, මහින්ද ජයතිස්ස ආදි නායකයින් මෙහිදී ජනතාව ඇමතූ නමුත් ගොවි ජනතාවට සම්බන්ධ කෘෂිකර්ම ඇමති කේ. ඩී. ලාල්කාන්ත හෝ නියෝජ්‍ය ඇමති නාමල් කරුණාරත්න මෙම රැළියේ දක්නට නොලැබීම ගැන ගොවි ජනතාව විවිධ අදහස් පළ කළා.

වී කිලෝවක් මිළදී ගැනීම රුපියල් 120 ට වඩා කිසිසේත් ම වැඩි නොකරන බව පැවසීම නිසාත්, වී වෙනුවට බඩ ඉරිඟු වැනි අතුරු භෝග වගා කරන ලෙස ගොවින්ට උපදෙස් දුන් නිසාත්, ලාල් කාන්ත හා නාමල් කරුණාරත්න යන දෙදෙනාට ගොවින්ට මුහුණ දීමට අපහසු වී ඇති බැවින් ඔවුන් මේ රැළියට නොපැමිණි බවයි ගොවින් පවසන්නේ.

ජනාධිපති අනුර කුමාර දිසානායක මහතා සිය කතාවේ ප්‍රධාන තේමාව කොටගෙන තිබුණේ දූෂණය වැළැක්වීම හා හොරුන්ට දඬුවම් දීමට ආණ්ඩුව ගෙන තියෙන පියවරයන් විස්තර කිරීමටයි.

මහජන මුදල් අවභාවිතා කළ සහ වංචා දූෂණවලට සම්බන්ධ වූ කිසිවකුට නීතියෙන් ගැලවුමක් නැති බවත් ඒ සඳහා වගකිවයුතු සියලු පාර්ශ්වයන්ට එරෙහිව තරා තිරම නොබලා නීතිය ක්‍රියාත්මක කරන බවත් ජනාධිපතිවරයා මෙහිදී අවධාරණය කළා.

විපක්ෂය විසින් එදින ම අනුරාධපුරයේ පවත්වන රැළිය ගැන සඳහන් කළ ජනාධිපතිවරයා,

''අපේ ආණ්ඩුවත් එක්ක ජනතාව ඉන්න තුරු අපිව හොල්ලන්න බැහැ. ඇතැම් විනාශකාරී කණ්ඩායම් වියරු වැටිලා. අපරාධ පරීක්ෂණ දෙපාර්තමේන්තුවට තිබුණේ අනුරාධපුරයට ගිහින් එක විසි දැලක් දාන්න. ඔක්කොම එකට අහුවෙනවා. ජනතාවට මුකුත්වෙලා නෑ, වෙලා තියෙන්නෙ මේ අයටයි. මෙරටේ නැවත බලය මාරු වෙනවා නම් එහෙම වෙන්නෙ අපටත් වඩා හොඳ කණ්ඩායමක් අතට පමණයි" යයි ද අනුර කුමාර දිසානායක මහතා ප්‍රකාශ කළා.

මෙය පෞද්ගලික පළිගැනීමක් නොව රටේ මුල්‍ය විනය සහ නීතියේ ආධිපත්‍යය තහවුරු කිරීමේ ක්‍රියාවලියක් බව ද ඔහු අවධාරණයෙන් සඳහන් කළා.

මේ අතර පොදුජන පෙරමුණේ ජාතික සංවිධායක පාර්ලිමේන්තු මන්ත්‍රී නාමල් රාජපක්ෂ රක්ෂිත බන්ධනාගාර ගතව සිටිය දී එම පෙරමුණ විසින් 12 වැනිදා අනුරාධපුරයේ දී පැවැත්වූ රැළිය බොහෝ දෙනාගේ විශේෂ අවධානයට යොමු වුණා.

ඒ ශ්‍රී ලංකා පොදුජන පෙරමුණේ නියෝජිතයින්ට අමතරව හිටපු අමාත්‍යවරුන් වන විමල් වීරවංශ, උදය ගම්මන්පිල, යන මහත්වරුන් හා ටිරාන් අලස් හා රාමනාදන් අර්ජුනා ඇතුළු පිරිසක් එක්ව සිටීම නිසයි.

මෙහි විශේෂත්වයක් වුණේ ශ්‍රී ලංකා පොදුජන පෙරමුණේ නායක හා හිටපු ජනාධිපති මහින්ද රාජපක්ෂ මහතා මෙම රැළියට සහභාගි වී සිටීම යි.

වයස හා අයහපත් සෞඛ්‍ය තත්වය හේතුවෙන් ඔහු වේදිකාවට ගොඩවූයේ තවත් කිහිප දෙනකුගේ උදව්වෙන් වන අතර හෙතෙම රැළිය ඇමතුවේ නෑ.

මෙම රැළිය ඇමතූ ජාතික නිදහස් පෙරමුණේ නායක විමල් වීරවංශ මහතා චීන ජනාධිපති ෂී ජිංපිං, රුසියානු ජනාධිපති පුටින්, ඉන්දීය  අගමැති නරේන්ද්‍ර මෝදි ඇතුළු රටවල් 40 ක නායකයින් එක්ව නව දිල්ලියේ දී 'බ්‍රික්ස්' සමුළුව පවත්වමින් ලෝක ආර්ථිකය ඇමරිකානු ඩොලරයෙන් ගලවා ගැනීමට සාකච්ඡා කරද්දී ශ්‍රී ලංකාවේ ජනාධිපති පොළොන්නරුවට ගොස් පච හළන බව ප්‍රකාශ කළා.

අල්ලස් හෝ දූෂණ විමර්ශන කොමිසම, අපරාධ පරීක්ෂණ දෙපාර්තමේන්තුව හා මුල්‍ය අපරාධ විමර්ශන ඒකකය මඟින් චෝදනා ඉදිරිපත් කොට නඩු පවරා ඇති විපක්ෂයේ දේශපාලන නායකයින් රාශියක් මෙම රැළියට සහභාගි වී සිටිය බව දේශපාලන විචාරකයින් පෙන්වා දෙනවා.

⋆⋆⋆   ⋆⋆⋆ ⋆⋆⋆   ⋆⋆⋆

පාර්ලිමේන්තුවේ කතානායකවරයාට අපල කාලයක් උදා වී ඇති බව පෙනෙනවා. වර්තමාන පාර්ලිමේන්තුවේ ප්‍රථම කතානායක අශෝක රන්වල මහතා ට එම තනතුර හැරයෑමට සිදු වුණේ ඔහුගේ 'ආචාර්ය' උපාධි සහතිකය ඉදිරිපත් කිරීමට අපොහොසත් වූ නිසයි.

ඔහු වෙනුවට පත්වූ වර්තමාන කතානායක වෛද්‍ය ජගත් වික්‍රමරත්න මහතාට ද බරපතල චෝදනා එල්ල වී ඇති අතර අල්ලස් හෝ දූෂණ විමර්ශන කොමිෂන් සභාව ඒ පිළිබඳව මේ දිනවල පරීක්ෂණ සිදුකර ගෙන යනවා.

නිල නිවාසයට අමතරව තවත් රජයේ නිවාස දෙකක් පාවිච්චි කිරීම, අමතර වාහන පාවිච්චිය සහ ඒ වෙනුවෙන් විශාල ඉන්ධන ප්‍රමාණයක් ලබා ගැනීම, සිය නිවෙස්වල රෙදි පිළි සේදීම හා ආහාර පාන සඳහා පාර්ලිමේන්තුවේ මුදල් වැය කිරීම පිළිබඳව කතානායක වරයාට විරුද්ධව අල්ලස් හෝ දූෂණ විමර්ශන කොමිසමට පැමිණිලි කර තිබෙන්නේ පාර්ලිමේන්තුවේ හිටපු නියෝජ්‍ය මහ ලේකම් චමින්ද කුලරත්න මහතා යි.

කතානායකවරයා විසින් මීට පෙර කුලරත්න මහතා එම තනතුරෙන් පහකොට තිබුණා.

මෙම චෝදනා පිළිබඳව පරීක්ෂණ පැවැත්වීමට පසුගිය සතියේ පාර්ලිමේන්තුවට පැමිණි අල්ලස් හෝ දූෂණ විමර්ශන කොමිසමේ නිලධාරීන් එහි ප්‍රධාන නිලධාරීන් කිහිප දෙනකුගෙන් ප්‍රකාශ සටහන් කරගෙන ඇතැම් ලිපි ගොනු ද රැගෙන ගිය බව පාර්ලිමේන්තු ආරංචි මාර්ග පවසනවා.

මේ සතියේ කොමිසම පාර්ලිමේන්තුවේ මහ ලේකම් කුෂානි රෝහණධීර මහත්මියගෙන් ද ප්‍රකාශයක් ලබා ගැනීමට යන බව ද දැන ගන්නට තිබෙනවා.

මේ පිළිබඳව පාර්ලිමේන්තු මන්ත්‍රී දයාසිරි ජයසේකර මහතා පසුගිය සතියේ පාර්ලිමේන්තුවට වරප්‍රසාද ප්‍රශ්නයක් ද ඉදිරිපත් කළා.

අල්ලස් හෝ දූෂණ විමර්ශණ කොමිසමට මුදල් ප්‍රතිපාදන වෙන් කරන්නේ පාර්ලිමේන්තුව විසින් බැවින් ද, උපරිමාධිකරණ වල විනිශ්චකාරවරුන් පත් කරන ව්‍යවස්ථාදායක සභාවේ සභාපති වන්නේ කතානායකවරයා බැවින් ද අල්ලස් පිළිබඳව පරීක්ෂණයක් පැවැත්වෙන අවස්ථාවේ කතානායකවරයා එම තනතුර දැරීම නුසුදුසු බැවින් පරීක්ෂණ නිම වන තුරු ඔහු කතානායක ධුරයෙන් ඉල්ලා අස්විය යුතු යැයි දයාසිරි ජයසේකර මහතා ගේ වරප්‍රසාද ප්‍රශ්නයේ දක්වා තිබෙනවා.

එම වරප්‍රසාද ප්‍රශ්නයේ මෙසේ ද දක්වා තිබෙනවා.

''අල්ලස් කොමිසමේ සාමාජිකයින් සහ අධ්‍යක්ෂ ජෙනරාල්වරයා පත් කිරීමට නිර්දේශ කරන්නේ කතානායකවරයා සභාපතිත්වය දරණ ආණ්ඩුක්‍රම ව්‍යවස්ථා සභාවයි. තමාට එරෙහිව විමර්ශන පවත්වන ආයතනයේ නිලධාරීන් පත් කරන සභාවේ ප්‍රධානියා ලෙස ඔහු තව දුරටත් කටයුතු කිරීම ආයතනික අපක්ෂපාතිත්වය හා මහජන විශ්වාසය බිඳදැමීමකි.

අල්ලස් කොමිසමේ තීරණයකට එරෙහිව සහනයක් ලබා ගැනීමට කතානායකවරයාට සිදුවන්නේ ශ්‍රේෂ්ඨාධිකරණයට යාම යි. එම ශ්‍රේෂ්ඨාධිකරණ විනිසුරුවරුන් ගේ පත්වීම අනුමත කරන ආණ්ඩුක්‍රම ව්‍යවස්ථා සභාවේ සභාපතිවරයා ලෙස ඔහු කටයුතු කිරීඹ බරපතල ළබැඳියාවන්ගේ ඝට්ටනයකිත

''මෙම විමර්ශනයට අදාළ සාක්ෂිකරුවන් වන්නේ පාර්ලිමේන්තු මහ ලේකම්වරයි යටතේ සේවය කරන මුල්‍ය හා ප්‍රධාන අංශ වල නිලධාරීන් ය. කතානායකවරයා ගේ පෞද්ගලික ලේකම් චමීර ගාල්ලගේ මහතා විසින් මෙම විමර්ශනයට බලපෑම් කිරීමට උත්සාහ කර ඇති බවට දැනටමත් පැමිණිල්ලක් ලැබී ඇති පසුබිමක පාර්ලිමේන්තුවේ ප්‍රධානියා ලෙස කතානායක වරයා තව දුරටත් ධුරයේ රැඳී සිටීම සාක්ෂි මර්ධනයට බලපාන බව'' ද දයාසිරි ජයසේකර මහතා සිය වරප්‍රසාද ප්‍රශ්නයෙන් පෙන්වා දී තිබෙනවා.

දයාසිරි ජයසේකර මන්ත්‍රීවරයා මෙම වරප්‍රසාද ප්‍රශ්නය ගැන කරුණු දක්වමින් කතා කිරීමට නැඟී සිටිය නමුත් කතානායකවරයා එයට අවසර දුන්නේ නැහැ.

කෙසේ වුවද ලබන සතිය වන විට මේ ප්‍රශ්නය තවත් උග්‍රවීමට ඉඩ ඇති බවත්, කතානායකවරයාට එම ධුරයෙන් ඉල්ලා අස්වන ලෙසට ආණ්ඩුව ඇතුළෙන් ම බලපෑම් එල්ල වෙමින් පවතින බවත් පාර්ලිමේන්තුවේ ආරංචි මාර්ග සඳහන් කරනවා.

මේ අතර තවත් ආරංචි මාර්ගයක් පැවසුවේ අල්ලස් හෝ දූෂණ විමර්ශන කොමිසම කතානායකවරයාට එරෙහිව ඉදිරිපත් වී ඇති පැමිණිල්ල විභාග කරනු ලබන්නේ ආණ්ඩුවේ ඉහළ තැනක අනුදැනුම ඇති ව බව යි.

   - ජගත් -